us ki duzdida-nigahi dekhna achchha laga
bhiid men ik ajnabi ka samna achchha laga
jis ki tasvir-e-tasavvur zehn men mahfuz hai
jada-e-ulfat men us ko dhundhna achchha laga
gholna kanon men ras shirini-e-guftar se
ruh-parvar us ka hansna bolna achchha laga
murtaish hota hai jis ko dekh kar tar-e-nafas
us ka zulf kham-ba-kham ka kholna achchha laga
dil se dil ko raah hoti hai ye hai us ka subut
jaate jaate us ka mud kar dekhna achchha laga
vajd-avar tha gul-o-bulbul ka rabt-e-bahami
ghuncha-o-gul se chaman men khelna achchha laga
hai jahan-e-rang-o-bu men husn jis ka intikhab
us ka hona bazm men jalva-numa achchha laga
mere siine men dhadakta hai dil-e-dard-ashna
is liye tuute hue dil jodna achchha laga
munakis har chiiz men hota hai ‘barqi’ jis ka aks
us ka chehra aina-dar-aina achchha laga
Leave a Reply