tasavvur men mire aise koi chehra nikalta hai
ki sukhi shaḳh par jaise hara patta nikalta hai
farishte ghar ki chaukhaT par khaḌe rahte hain saf bandhe
ki jab schōl ko ghar se koi bachcha nikalta hai
zamin bhi jaise mera imtihan lene ke dar pai hai
jidhar paanv baḌhata huun udhar sahra nikalta hai
haqiqat un ki jo bhi ho aqida hai yahi apna
inhin ḳhvabon se manzil ke liye rasta nikalta hai
safar suraj ka mujh ko jab kabhi darpesh aa jaa.e
to mera ham-safar ban kar mira saaya nikalta hai
karegi manfa.at hasil isi se fasl-e-mustaqbil
hamari zaat se jo ye suḳhan dariya nikalta hai
mujhe meri nazar men mo’atabar karta hai vo paiham
mira dushman mire haq men sada sachcha nikalta hai
hamari pyaas sachchi hai ham isma.il vaale hain
jahan eḌi ragaḌ den ham vahin dariya nikalta hai
zalil-o-ḳhvar hote hain ‘obaid’-e-ba-ḳhabar logo
mohabbat ka magar sar se kahan sauda nikalta hai
Leave a Reply