huun kis maqam pe dil men tire ḳhabar na lage
tire saliqa-e-guftar ko nazar na lage
ghira hua tha tu kuchh nagavar logon men
malal ye hai ki us vaqt ham ko par na lage
asir-e-qarya-e-vahshat huun ek muddat se
ḳhirad ki raah kisi taur mo’tabar na lage
makan vahi hai par us ka makin kya uTTha
sahar bhi ho to vo pahli si ab sahar na lage
akeli shaam khaḌi thi udaas jangal men
tuyur ba-ḳhabar o ashna-shajar na lage
saza-e-jazba o ehsas-e-jan ke saath rahi
vo rog rog hi kya hai jo umr bhar na lage
baja hai ḳhvab-navardi pa ḳhvab aaise hon
khule jo aankh to apna hi ghar khanDar na lage
jo ba-kamalon ki tauqir kam kare ‘shahid’
hamare haath koi aisa bhi hunar na lage
Leave a Reply