Irshad Ahmad Niazi
ḳhal-o-ḳhad oḌhe tasavvur ko pareshan kiya
ishq ne apne ta.iin jism ka nuqsan kiya
ḳhud chali aa.i zarurat mire darvaze par
main ne ik rah pe jo taskin ko qurban kiya
raat Dhalne se bahut pahle ka qissa hai visal
jis ne kuchh bujhte charaghon ko pasheman kiya
raushni uungh rahi thi kahin divar ke beach
main ne jab tiira makanon se gurezan kiya
ḳhvab aur ḳhauf ne aa.ine men ram karna tha
yak-ba-yak lau ki lapak ne mujhe hairan kiya
Leave a Reply