vafa ki raah men gul hi nahin hai ḳhaar bhi hai
ye jurm vo hai ki padash us ki daar bhi hai
sanbhal ke aa mire hamdam ki rah-e-ishq-o-vafa
maqam-e-sajda bhi maidan-e-kar-zar bhi hai
mire ḳhuda tiri rahmat ki aas rakhta hai
tira ye banda ki ḳhati bhi sharmsar bhi hai
ḳhizan ka daur hai ghabra na bulbul-e-ghamgin
ḳhizan ke ba.ad hi phir mausam-e-bahar bhi hai
vo vaqt duur nahin hai ki phir tu chahkega
ki ḳharzar men poshida lala-zar bhi hai
nashe men mast hain jo log vo bhi ye sun len
nashe ke ba.ad hi a.aza-shikan ḳhumar bhi hai
ye karobar-e-mohabbat bhi kya bala hai ‘uruj’
yaqin hai va.ada-ḳhilafi ka intizar bhi hai
Leave a Reply