mohabbat hai to phir andaza-e-shauq-e-vafa kyon ho
shikayat dard ki kyon ho jafaon ka gila kyon ho
kisi ke kaan tak pahunche vo meri iltija kyon ho
bar aana jis ka mumkin ho vo mera mudda.a kyon ho
ye rah-e-ishq hai ai dil ma.al-andeshiyan kaisi
junun hai dastgir apna koi zanjir-e-pa kyon ho
hayat-e-arzu parvarda-e-aghosh-e-tufan hai
jise ho fikr sahil ki vo mera naḳhuda kyon ho
na ye fariyad hogi phir na ye aahen na ye naale
dil-e-nadan mohabbat men haqiqat-ashna kyon ho
vo nazren ḳhaak men jin ko milana bhi nahin aata
unhin nazron se vabasta hamara mudda.a kyon ho
hudud-e-shash-jihat se mavara jab us ke jalve hain
to parvaz-e-mohabbat ta-ba-hadd-e-do-sara kyon ho
ḳhuda ke yaad aane ka baḌa achchha zariya hai
shanasa-e-karam vo bani-e-jaur-o-jafa kyon ho
muhit-e-arsh-o-kursi jab ḳhuda ka zill-e-rahmat hai
‘munir’ apni ḳhata-koshi ki koi intiha kyon ho
Leave a Reply