Ek Tamanna Mein Giraftar the Hum Bhi Tum Bhi

ik tamannā meñ giraftār the ham bhī tum bhī

saarī duniyā ke gunahgār the ham bhī tum bhī

dilkashī dekh ke chaḌhte hue dariyāoñ kī

Dūbne ke liye tayyār the ham bhī tum bhī

be-sabab donoñ meñ har ek ko dilchaspī thī

aur har ek se bezār the ham bhī tum bhī

kāmyāb aise kahāñ apne muḳhālif hote

mustaqil un ke madad-gār the ham bhī tum bhī

aaj tak jiine kā ilzām liye phirte haiñ

chand sāñsoñ ke ḳhatāvār the ham bhī tum bhī

muskurāhaT meñ kabhī ġham ko chhupā hī na sake

ya.anī nākām adākār the ham bhī tum bhī

Leave a Comment