sharab-e-ishq se maḳhmur sab ḳhurd-o-kalan honge
tuyur-e-bagh-e-ulfat mahv-e-didar-e-butan honge
dil-e-shabnam men ummidon ki kaliyan muskura.engi
urus-e-hajla-e-gulshan ke bhi arman javan honge
gale mil kar karenge barg-o-gul sargoshiyan paiham
mohabbat ke manazir dekhne ko baghban honge
nasim-e-sub.h men jis dam anadil chahchaha.enge
baharen ham ko DhunDhengi na jaane ham kahan honge
hamari zindagi ko bojh jo ḳhud par samajhte hain
pas-e-furqat ba-sad hasrat vahi mahv-e-fughan honge
paḌega vaqt jab un par to DhunDhenge hamen har su
magar us vaqt ham shahr-e-ḳhamoshan men nihan honge
hamari sarhad-e-tanha.i pe ro.egi tanha.i
baghair-e-qafila bhi ham amir-e-karvan honge
zara ik baar ji bhar kar dar-o-divar takne do
mire tarik hujre men ye nazzare kahan honge
tumhari vasf sun sun kar yahi mahsus hota hai
tumhare naznin gesu misal-e-kahkashan honge
usi ki god men sar rakh ke main aansu baha.unga
tire naqsh-e-qadam jis ḳhaak ke dil men nihan honge
umidon ki chaTanen jab bahengi sail-e-ghurbat men
ye manzar dekh kar saton tabaq girya-kunan honge
inhi lamhon ki chahat ne mujhe di hai hayat-e-nau
zamin ki god men jalva-numa jab asman honge
hamari aarzu hai ek pal bahon men bhar liije
ki kuchh hi der men ham raunaq-e-nok-e-sinan honge
‘falak’ ki qabr par bhi fatiha paḌhne vo a.enge
zahe-qismat fasil-e-ishq se jis dam ayaan honge
Leave a Reply