ba-zahir to tanavar dikh rahe hain
magar ye peḌ saare khokhle hain
ye kis sham.a ki chahat men patinge
barahna paanv suraj par khaḌe hain
ghazal kitni apahij ho ga.i hai
ghazal ke dast-o-bazu kah rahe hain
dararen jism ki khulne lagi hain
lahu ke qatre bar-amad hue hain
har ik janib hai tariki ka jangal
ujale rasta bhaTke hue hain
‘navaz’ us ki gali ke saare patthar
mujhe achchhi tarah pahchante hain
Leave a Reply