sambhal ai qadam ki ye kar-gah-e-nishat-o-gham hai ḳhabar bhi hai
jise log kahte hain rahguzar kisi pa-shikasta ka ghar bhi hai
mujhe muddaton yahi vahm tha ki ye ḳhaak kimiya ban ga.i
isi kashmakash men guzar ga.i ki fughan karun to asar bhi hai
hama-inkisar ki kaifiyat hai dam-e-vida.a ki bebasi
mujhe yuun payam-e-sukun na de tujhe apne aap se Dar bhi hai
miri jur.aton pe bhi kar nazar tujhe chahun sau dafa TuuT kar
ye baja ki sina-e-shauq men gham-e-pasbani-e-dar bhi hai
tujhe agahi ki nahin ḳhabar miri gumrahi pe na tanz kar
are vaqt vaqt ki baat hai yahi aib rashk-e-hunar bhi hai
koi us ka dard bhi puchhta ki vo kuchh dinon se udaas hai
ye junun ki pursish-e-hal kya jo azal se ḳhak-basar bhi hai
ye hai be-gunahi ka majra koi yunhi mujh se khincha raha
yahi soch soch ke rah gaya ki mire ḳhuda ko ḳhabar bhi hai
tujhe kho ke go main sambhal gaya ye na kah ki ‘shaz’ badal gaya
pas-e-parda teri panah men miri shaam bhi hai sahar bhi hai
Leave a Reply