akasr is tarah se bhi raat basar hoti hai
raat ki raat nazar janib-e-dar hoti hai
jis se duniya-e-sukun zer-o-zabar hoti hai
vo mulaqat sar-e-rahguzar hoti hai
Thes lagti hai jahan ishq ki ḳhuddari ko
zindagi baḌh ke vahin sina-sipar hoti hai
ye sapedi-e-sahar hai ki sitaron ka kafan
raat dam toḌ rahi hai ki sahar hoti hai
apne daman se to main ponchh raha huun aansu
daman-e-dost ki tauhin magar hoti hai
aap ara.ish-e-gesu men lage hain nahaq
fateh-e-dil to mohabbat ki nazar hoti hai
rasta roke hue kab se khaḌi hai duniya
na idhar hoti hai zalim na udhar hoti hai
tu nazar bhar ke sar-e-bazm na dekh un ko ‘nazir’
is se rusva.i-e-tahzib-e-nazar hoti hai
Leave a Reply