Atif Tauqeer
oḌh le phir se badan raat ke baazu nikle
ḳhvab-dar-ḳhvab kisi ḳhauf ka chaqu nikle
aa.ine par kisi naḳhun ki ḳharashon ka vahm
aks nochun to vahan bhi tira jaadu nikle
teri avaz ki kirnon se tasavvur raushan
phuul nikle ki tire jism ki ḳhushbu nikle
sho.abda-gar tiri aghosh talak ja pahuncha
tere pahlu se ka.i aur bhi pahlu nikle
jashn-e-zindan ki rivayat ka bharam qaa.em hai
jism ne raqs kiya aankh se aansu nikle
Leave a Reply