Arzoo Lakhnavi
mir-e-mahfil na hue garmi-e-mahfil to hue
sham.a-e-taban na sahi jalta hua dil to hue
na sahi ḳhaak ke putlon men sifat-e-malaki
baare is bar-e-vafa ke mutahammil to hue
hausle dil ke mohabbat men jo piste hi rahe
kar ke himmat tire ghamzon ke muqabil to hue
purshis-e-gham-zadagan bahr-e-tafannun hi sahi
ḳhair se aap bhi is bazm men shamil to hue
be-asar aah se bhi itni tasalli hai zarur
munh taka karte the jo vo kisi qabil to hue
aan rakh li tiri shamshir-e-ada ki yuun bhi
jin ko marna nahin aata tha vo bismil to hue
sanad-e-sabr sahi paak dilon ke nasur
aise maqtul bhi ik tarah ke qatil to hue
rashk-e-dushman ki talafi ko ye pahlu nahin kam
gham-e-jan-kah-e-mohabbat ke vo qatil to hue
ḳhud se dukh mol len ye kaam kuchh asan na tha
kha ke ik choT maze dard ke hasil to hue
ḳhud-kushi men to ḳhalal ‘arzu’ aaya lekin
haath un ke miri gardan men hama.il to hue
Leave a Reply