safar ke tasavvur se sahma hua huun
baḌi der se yuun hi Thahra hua huun
udhar Dubte ja rahe hain sitare
idhar main ḳhayalon men uljha hua huun
jalane ke qabil na likhne ke laa.eq
main kaghaz huun saada pa bhiga hua huun
sambhale huun ḳhud ko baḌi kavishon se
mujhe chhu na lena main chaTḳha hua huun
musalsal paḌi hai kaḌi dhuup mujh par
mira rang dekho main kaisa hua huun
na baaqi hai saaya na barg-o-samar hain
main mausam ki sazish ka maara hua huun
thamengi kabhi to muḳhalif hava.en
yahi soch kar ḳhud men simTa hua huun
Leave a Reply