Riyaz Khairabadi
hangam-e-nazaa girya yahan be-kasi ka tha
tum hans pade ye kaun sa mauqa hansi ka tha
uttha na meri gor se dushman bhi baith kar
kya aalam aaj haae miri bekasi ka tha
chhaya hai asman ki tarah qabr-e-ghair par
dil men mire ghubar bhara jo kabhi ka tha
dil ne mujhe kharab kiya ku-e-yar men
dushman par e’tibar mujhe dosti ka tha
sahra men phir rahe the sulaiman bane hue
jis ko junun kahte hain saaya pari ka tha
dikh jaega dil is liye jaari hue na ashk
dekho to paas nazaa men kitna kisi ka tha
ye apni vaza aur ye dushnam se farosh
sun kar jo pi gae ye maza muflisi ka tha
jis anjuman men baith gaya raunaq aa gai
kuchh aadmi ‘riyaz’ ajab dil-lagi ka tha
Leave a Reply