bujhe bujhe se hain sha.ir ke zehn-o-dil ke diye
bhaTak raha hai kahan jaa.e raushni ke liye
ravish ravish pe daraḳhshan hai barq-e-ḳhauf-o-hiras
jhulas rahe hain dar-o-bam jazba-o-ehsas
nazar udaas hai viran hain saare nazzare
jabin-e-sub.h se phuTe lahu ke favvare
zamin pe lashon ke gulshan men ḳhuun ki nami
ab ehtimam-e-bahar-e-chaman men kya hai kami
jamal-e-sub.h-e-vatan anso.on men mudgham hai
urus-e-fasl baharan ki aankh pur-nam hai
ba-faiz-e-jabr-o-sitam gham ne fat.h paa.i hai
vafa ke naam pe dil ne shikast khaa.i hai
shi.ar-e-dida-vari se gulon ke shaad nahin
chaman ke phuul chaman hain ye un ko yaad nahin
sitam ko ahl-e-havas bhi sitam samajhte hain
ye aur baat hai sho.alon ko phuul kahte hain
simaTti raat ke saa.e sahar ki raah men hain
ham aur chand ghaḌi zulm ki panah men hain
Leave a Reply