Poet
hava ke lams se bhaḌka bhi huun main
sharara hi nahin shola bhi huun main
vo jin ki aankh ka taara bhi huun main
un hi ke paanv ka chhala bhi huun main
akahra hai mira pairahan-e-zat
bura huun ya bhala jaisa bhi huun main
hava ne chhin li hai meri ḳhushbu
misal-e-gul agar mahka bhi huun main
mire raste men haa.il hai jo divar
usi ke saa.e men baiTha bhi huun main
taras jaata huun jis ke dekhne ko
usi ik shaḳhs se bachta bhi huun main
main jin logon ki surat se huun be-zar
unhi men raat din rahta bhi huun main
jo meri ḳhush-libasi ke hain qaa.el
un hi ke samne nanga bhi huun main
sarasar jhuuT hai jo baat meri
usi ik baat men sachcha bhi huun main
agarche fitratan kam-go huun phir bhi
jo sach puchho to kuchh banta bhi huun main
bahut is shahr men rusva huun ‘rashid’
magar kya vaqa.i aisa bhi huun main
Leave a Reply