is shahr men nishana-e-qatil hami to hain
kuchh jabiron ki raah men haa.il hami to hain
jo bechne chale hain mata-e-bahar ko
un dushmanon ke madd-e-muqabil hami to hain
gul-kari-e-chaman men hamara lahu bhi hai
rangini-e-bahar men shamil hami to hain
jo daulat-e-hunar ke talabgar hain abhi
ai rabb-e-harf-o-saut vasa.el hami to hain
jo kho ga.e hain pech-o-ḳham-e-rahguzar men
un sab ke muntazir sar-e-manzil hami to hain
ik umr se hain halqa-e-girdab men ghire
na-ashna-e-qurbat-e-sahil hami to hain
ham hi se hai ye raunaq-e-bazm-e-hayat bhi
is karobar-e-vaqt ka hasil hami to hain
us ne ata kiya hai gham-e-do-jahan hamen
us ki navazishat ke qabil hami to hain
ham-rahyan-e-jada-e-duniya se kya gila
‘shahid’ ḳhud apni zaat se ghafil hami to hain
Leave a Reply