hikayat-e-lab-o-rukhsar se aage nahin jaate
vo naghme jo tumhare pyaar se aage nahin jaate
kamanden dalne aae the jo bam-e-surayya par
vahi ab saya-e-divar se aage nahin jaate
gada-e-zat kya janen nava-e-kaenat ai dil
ye vo mansur hain jo daar se aage nahin jaate
badi himmat dikhaenge to sahil chhod jaega
hamare nakhuda manjdhar se aage nahin jaate
ajab ahl-e-samaat hain jo zanjiron se ghabra kar
tiri pazeb ki jhankar se aage nahin jaate
murattab jin ko apni abla-pai nahin karti
vo afsane gul-o-gulzar se aage nahin jaate
Leave a Reply