apne riste hue zaḳhmon ki qaba laaya huun
zindagi meri taraf dekh ki main aaya huun
kisi sunsan jazire se pukaro mujh ko
main sadaon ke samundar men nikal aaya huun
kaam aa.i hai vahi chhanv ghani bhi jo na thi
vaqt ki dhuup men jis vaqt main kumhlaya huun
ḳhairiyat puchhte hain log baḌe tanz ke saath
jurm bas ye hai ki ik shoḳh ka ham-saya huun
sub.h ho jaa.e to us phuul ko dekhun ki jise
main shabistan-e-baharan se uTha laaya huun
asr-e-nau mujh ko nigahon main chhupa kar rakh le
ek miTti hui tahzib ka sarmaya huun
Leave a Reply