Aqeel Shah
galiyon men lahu-rezi ka kuchh hal nikal aa.e
log is liye ḳhud janib-e-maqtal nikal aa.e
main kasa-ba-daston ke qabile ka huun lekin
ḳhush-qismati se haath mire shal nikal aa.e
rone se mujhe ḳhalq-e-ḳhuda rok rahi thi
phir meri taraf-dari men badal nikal aa.e
ik sat.h-e-mohabbat pe khaḌa soch raha huun
aisa na ho ye jhiil bhi daldal nikal aa.e
afsos ki ab bhi hain tire daam men kuchh kuchh
ham samjhe the is baar mukammal nikal aa.e
abad rahe shahr-e-ḳhamoshan kise ma.alum
mujh aisa musafir yahan kis pal nikal aa.e
Leave a Reply