(1)
taaza hain abhi yaad men ai saqi-e-gulfam
vo aks-e-rukh-e-yar se lahke hue ayyam
vo phuul si khulti hui didar ki saaat
vo dil sa dhadakta hua ummid ka hangam
ummid ki lau jaaga gham-e-dil ka nasiba
lo shauq ki tarsi hui shab ho gai akhir
lo duub gae dard ke be-khvab sitare
ab chamkega be-sabr nigahon ka muqaddar
is baam se niklega tire husn ka khurshid
is kunj se phutegi kiran rang-e-hina ki
is dar se bahega tiri raftar ka simab
us raah pe phailegi shafaq teri qaba ki
phir dekhe hain vo hijr ke tapte hue din bhi
jab fikr-e-dil-o-jan men fughan bhuul gai hai
har shab vo siyah bojh ki dil baith gaya hai
har subh ki lau tiir si siine men lagi hai
tanhai men kya kya na tujhe yaad kiya hai
kya kya na dil-e-zar ne dhundi hain panahen
ankhon se lagaya hai kabhi dast-e-saba ko
daali hain kabhi gardan-e-mahtab men bahen
(2)
chaha hai isi rang men laila-e-vatan ko
tadpa hai isi taur se dil us ki lagan men
dhundi hai yunhi shauq ne asaish-e-manzil
rukhsar ke kham men kabhi kakul ki shikan men
us jan-e-jahan ko bhi yunhi qalb-o-nazar ne
hans hans ke sada di kabhi ro ro ke pukara
puure kiye sab harf-e-tamanna ke taqaze
har dard ko ujyala har ik gham ko sanvara
vapas nahin phera koi farman junun ka
tanha nahin lauti kabhi avaz jaras ki
khairiyyat-e-jan rahat-e-tan sehhat-e-daman
sab bhuul gaiin maslihaten ahl-e-havas ki
is raah men jo sab pe guzarti hai vo guzri
tanha pas-e-zindan kabhi rusva sar-e-bazar
garje hain bahut shaikh sar-e-gosha-e-mimbar
kadke hain bahut ahl-e-hakam bar-sar-e-darbar
chhoda nahin ghairon ne koi navak-e-dushnam
chhuti nahin apnon se koi tarz-e-malamat
us ishq na us ishq pe nadim hai magar dil
har daagh hai is dil men ba-juz-dagh-e-nadamat
Leave a Reply