Wafa Ka Zikr chhiDa Tha Ki Raat Bit Gai

Taimur Hasan

vafa ka zikr chhiḌa tha ki raat biit ga.i

abhi to rang jama tha ki raat biit ga.i

miri taraf chali aati hai niind ḳhvab liye

abhi ye muzhda suna tha ki raat biit ga.i

main raat ziist ka qissa sunane baiTh gaya

abhi shurua kiya tha ki raat biit ga.i

yahan to charon taraf ab talak andhera hai

kisi ne mujh se kaha tha ki raat biit ga.i

ye kya tilism ye pal bhar men raat aa bhi ga.i

abhi to main ne suna tha ki raat biit ga.i

shab aaj ki vo mire naam karne vaala hai

ye inkishaf hua tha ki raat biit ga.i

naved-e-sub.h jo sab ko sunata phirta tha

vo mujh se puchh raha tha ki raat biit ga.i

uThe the haath dua ke liye ki raat kaTe

dua men aisa bhi kya tha ki raat biit ga.i

ḳhushi zarur thi ‘taimur’ din nikalne ki

magar ye gham bhi siva tha ki raat biit ga.i