Masud Husain Khan
tire dayar men koi bhi ham-zaban na mila
hazar naqsh mile koi razdan na mila
main sochta huun ki ye bhi hasin hain lekin
tasavvur-e-ruḳh-e-janan ka imtihan na mila
ye sach nahin hai ki chhuTne ke ba.ad jan-e-visal
tujhe zamin na mili mujh ko asman na mila
ada-e-ḳhas mili aur sala-e-am mili
magar kahin bhi vo andaz-e-jan-e-jan na mila
gada-shanasi-e-ahal-e-karam musallam hai
ham uTh ke jis ke qadam len vo pasban na mila
jahan bhi dekha vahin paaya tujh ko jan-e-visal
tiri nigah ka partav kahan kahan na mila
vo dil hi kya jo mohabbat se ashna na hua
safina kya vo jise bahr-e-be-karan na mila
kise suna.en ghazal bahr-e-sharh-e-dil ‘mas.ud’
ki is dayar men koi bhi nukta-dan na mila
Leave a Reply