ham ghar hi men rahte to tamasha to na hote
yuun kushta-e-be-dad-e-zamana to na hote
gham-e-dil pe shikast-e-talab-e-jan ka hai bhari
miT jaate tag-o-taz men paspa to na hote
kho jaate kisi badiya-e-haft-bala men
ḳhilqat men magar randa-e-duniya to na hote
duniya se jo rakhte kabhi duniya se ravabit
apne hi zamane men yuun tanha to na hote
ho rahte haram ke to jiye jaate sukun se
badnam-e-rah-e-dair-o-kalisa to na hote
avara-mizaji ki saza ḳhuub thi lekin
pa-basta-e-ḳhak-e-lab-e-dariya to na hote
jiite hain to sab khul ga.e ausaf jahan par
mar jaate to achchha tha ki rusva to na hote
uncha jo uTha rakhte alam apni ana ka
a.ala na sahi arsh pe adna to na hote
Leave a Reply