na darmiyan na kahin ibtida men aaya hai
badal ke bhes miri intiha men aaya hai
usi ke ruup ka charcha hai ab fazaon men
hava ke ruḳh ko palaT kar hava men aaya hai
kabhi jo tez hui lau to jagmaga uTTha
barahna tha jo kabhi ab qaba men aaya hai
mujhe hai phuul ki patti sa ab bikhar jaana
vo chhup-chhupa ke miri hi rida men aaya hai
asir-e-zulf ko shayad yahin riha.i hai
pukarta huun jise vo sada men aaya hai
nigal ga.i hai tasavvur ki aanch aanch ise
koi vajud kisi saneha men aaya hai
main chheḌta huun samundar ki dhun men naghmon ko
vahi jo raag dil-e-mutriba men aaya hai
usi ke sher sabhi aur usi ke afsane
usi ki pyaas ka badal ghaTa men aaya hai
Leave a Reply