momin-khan-momin

Ghairon Pe Khul Na Jae Kahin Raaz Dekhna

ghairon pe khul na jaae kahin raaz dekhna

meri taraf bhi ghamza-e-ghammaz dekhna

udte hi rang-e-rukh mira nazron se tha nihan

is murgh-e-par-shikasta ki parvaz dekhna

dushnam-e-yar tab-e-hazin par giran nahin

ai ham-nafas nazakat-e-avaz dekhna

dekh apna hal-e-zar munajjim hua raqib

tha sazgar tala-e-na-saz dekhna

bad-kam ka maaal bura hai jaza ke din

hal-e-siphar-e-tafraqa-andaz dekhna

mat rakhiyo gard-e-tarik-e-ushshaq par qadam

pamal ho na jaae sar-afraz dekhna

meri nigah-e-khira dikhate hain ghair ko

be-taqati pe sarzanish-e-naz dekhna

tark-e-sanam bhi kam nahin soz-e-jahim se

‘momin’ gham-e-maal ka aghaz dekhna

More Poems

Leave a Comment