Sattar Syed
lahu men phuul khilane kahan se aate hain
na.e ḳhayal na jaane kahan se aate hain
ye kaun log hain har shaam taq-e-mizhgan par
charagh-e-yad jalane kahan se aate hain
ḳhizan ki shaḳh men hairan hai aankh ki konpal
palaT ke ahd purane kahan se aate hain
samundaron ko sikhata hai kaun tarz-e-ḳhiram
zamin ki tah men ḳhazane kahan se aate hain
zamam-e-abr gurezan hai kis ke hathon men
muhit-e-ḳhosha men daane kahan se aate hain
safar-e-nasib parindo! tumhare honTon par
ye ḳhush-gavar tarane kahan se aate hain
ḳhushi ke ahd chale jaate hain kahan ‘sayyad’
udasiyon ke zamane kahan se aate hain
Leave a Reply