qatra-e-ab ko kab tak miri dharti tarse
aag lag jaae samundar men to paani barse
surkh mitti ki rida odhe hai kab se akash
na shafaq phule na rim-jhim kahin badal barse
ham ko khinche liye jaate hain sarabon ke bhanvar
jaane kis vaqt men ham log chale the ghar se
kis ki dahshat hai ki parvaz se khaif hain tuyur
qumriyan shor machati nahin kis ke dar se
char-su kucha-o-bazar men mahshar hai bapa
khauf se log nikalte nahin apne ghar se
mud ke dekha to hamen chhod ke jaati thi hayat
ham ne jaana tha koi bojh gira hai sar se
Leave a Reply