in ko ḳhala men koi nazar aana chahiye
ankhon ko TuuTe ḳhvab ka harjana chahiye
vo kaam rah ke shahr men karna paḌa hamen
majnun ko jis ke vaste virana chahiye
hai hijr to kabab na khane se kya husul
gar ishq hai to kya hamen mar jaana chahiye
is zaḳhm-e-dil pe aaj bhi surḳhi ko dekh kar
itra rahe hain ham hamen itrana chahiye
dana.iyan bhi ḳhuub hain lekin agar mile
dhoka hasin sa to use khana chahiye
tanha.iyon pe apni nazar kar zara kabhi
ai bevaquf dil tujhe ghabrana chahiye
is sha.iri men kuchh nahin naqqad ke liye
dildar chahiye koi divana chahiye
Leave a Reply