tire ḳhayal se dilchaspiyan banate hain
varaq pe dil ke chalo titliyan banate hain
safar hayat ka behad hasin guzrega
ana ko maar ke baisakhiyan banate hain
main janta huun ye dariya nahin hai sahra hai
to ret par hi chalo machhliyan banate hain
uTha hi li hai jo divar tum ne angan men
to bhaa.i is men chalo khiḌkiyan banate hain
khulega is tarah qismat ka band darvaza
jo kavishon ki agar chabiyan banate hain
hamari raah men haa.il hui hai jo ‘ḳhalid’
usi chaTan se ab siḌhiyan banate hain
Leave a Reply