Kya Hai Is Dil Ka Haal Mat Puchho

kyā hai is dil kā haal mat pūchho

ham se nāzuk savāl mat pūchho

jaan jā.egā kul zamāna sab

zindagī hai muhāl mat pūchho

shā.irī aur adab kī duniyā meñ

kaun hai bā-kamāl mat pūchho

ham ko denā subūt hai fan kā

ḳhuuñ meñ hai kyā ubaal mat pūchho

shohrateñ kis tarah kī mere liye

le ke aayā ye saal mat pūchho

vaqt ik din badal ke rakh degā

us kī har ek chaal mat pūchho

paḌh rahā huuñ ġhazal samajh lenā

hai ye kis kā ḳhayāl mat pūchho

hubb-e-yārāñ mirā ḳhazāna hai

us meñ kitnā manāl mat pūchho

kaise haiñ bāl-o-par ye ‘panchhī’ ke

kaise haiñ ḳhadd-o-ḳhāl mat pūchho

Leave a Comment