akhtar-shirani

Main Aarzu-E-Jaan Likhun Ya Jaan-E-Arzu!

main arzu-e-jan likhun ya jan-e-arzu!

tu hi bata de naaz se iman-e-arzu!

aansu nikal rahe hain tasavvur men ban ke phuul

shadab ho raha hai gulistan-e-arzu!

iman o jaan nisar tiri ik nigah par

tu jan-e-arzu hai tu iman-e-arzu!

hone ko hai tulu sabah-e-shab-e-visal

bujhne ko hai charagh-e-shabistan-e-arzu!

ik vo ki arzuon pe jiite hain umr bhar

ik ham ki hain abhi se pashiman-e-arzu!

ankhon se ju-e-khun hai ravan dil hai daagh daagh

dekhe koi bahar-e-gulistan-e-arzu!

dil men nashat-e-rafta ki dhundli si yaad hai

ya sham-e-vasl hai tah-e-daman-e-arzu!

‘akhtar’ ko zindagi ka bharosa nahin raha

jab se luta chuke sar-o-saman-e-arzu!

More Poems

Leave a Comment