Zia Faruqi
na vo ghar raha na vo bam-o-dar na vo chilmanen na vo palki
magar ab bhi meri zaban pe hai vahi dastan sin-o-sal ki
chalo bal-o-par ko sameT len karen fikr ab kisi Daal ki
ye ghurub-e-mehr ka vaqt hai ye ghaḌi hai din ke zaval ki
sabhi mausamon se guzar gaya koi bojh dil pe liye hue
mujhe raas aa.i na rut koi na vo hijr ki na visal ki
tha dilon ka ye bhi ik imtihan ki takallufat the darmiyan
mujhe Dar tha us ke javab ka use fikr mere saval ki
jo chale to rah-e-aman nahin jo ruke to manzilen kho ga.iin
tiri rahguzar bhi ajiib hai tiri manzilen bhi kamal ki
mire zaḳhm saare mahak uThe jo chali hava-e-nihal-e-gham
koi dasht-e-jan se guzar gaya uThi gard tere ḳhayal ki
vo mujhe mila bhi to is tarah milen jaise shams-o-qamar ‘ziya’
tha jo lamha is ke uruuj ka vo ghaḌi thi mere zaval ki
Leave a Reply