gir pade daant hue mu-e-sar ai yaar safed
kyuun na ho khauf-e-ajal se ye siyahkar safed
do qadam fart-e-nazakat se nahin chal sakta
rang ho jaata hai us ka dam-e-raftar safed
us masiha ki jo ankhen huiin gulzar men surkh
ho gai khauf se bas nargis-e-bimar safed
gul-e-nasrin ko nahin josh chaman men bulbul
hai nazakat ke sabab chehra-e-gulzar safed
ghar mire shab ko jo vo rashk-e-qamar aa nikla
ho gae partav-e-rukh se dar o divar safed
lab o dandan ke tasavvur men jo roya main kabhi
ashk do-char bahe surkh to do-char safed
hui sarsabz jo sohbat men ‘amanat’ ki ghazal
rang dushman ka hua rashk se ik baar safed
Leave a Reply