behoshiyon ne aur ḳhabardar kar diya
soi jo aql ruuh ne bedar kar diya
allah re husn-e-dost ki a.ina-dariyan
ahl-e-nazar ko naqsh-ba-divar kar diya
ya rab ye bhed kya hai ki rahat ki fikr ne
insan ko aur gham men giraftar kar diya
dil kuchh panap chala tha taghaful ki rasm se
phir tere iltifat ne bimar kar diya
kal un ke aage sharah-e-tamanna ki aarzu
itni baḌhi ki nutq ko bekar kar diya
mujh ko vo baḳhshte the do aalam ki nematen
mere ghurur-e-ishq ne inkar kar diya
ye dekh kar ki un ko hai ranginiyon ka shauq
ankhon ko ham ne dida-e-ḳhun-bar kar diya
Leave a Reply