Kabhi Hans Kar Kabhi Aansu Baha Kar Dekh Leta Hun

kabhi hans kar kabhi aansu baha kar dekh leta huun

main har chehre ko a.ina dikha kar dekh leta huun

bahut bechain kar deti hain jab tanha.iyan ghar ki

dar-o-divar par shaklen bana kar dekh leta huun

chhupata hai bahut mujh ko mira saaya magar phir bhi

main ḳhud ko raushni se duur ja kar dekh leta huun

nazar aata nahin jab harf koi lauh-e-alam par

main apna naam likh kar aur miTa kar dekh leta huun

jise dekha nahin hai dekh kar bhi meri ankhon ne

main us ko apne ḳhvabon men saja kar dekh leta huun

nahin milta kahin jab apni hasti ka nishan mujh ko

main apna aks paani men baha kar dekh leta huun

jise dekha nahin rota huun us ki yaad men shab-bhar

jise paaya nahin us ko ganva kar dekh leta huun

kabhi karna ho andaza jab apne dard ka mujh ko

main us bedard ke dil ko dukha kar dekh leta huun

pahan leti hain jab shaḳhen hare mausam ke pairahan

koi TuuTa hua patta uTha kar dekh leta huun