Saleem Figar
fasl-e-ḳhizan men shaḳh se patta nikal de
sukhe shajar se khinch ke saaya nikal de
mujh ko amaan ho qarya-e-vahm-o-guman men
de kar yaqin dil se tu ḳhadsha nikal de
chahe sharar se phunk de saare jahan ko
chahe jise vo aag se zinda nikal de
rahbar nahin hai us sa koi do jahan men
bahr-e-ravan ko kaaT kar rasta nikal de
be-jan pattharon se kare zindagi kashid
divar-e-ḳhisht-o-sang se pauda nikal de
Leave a Reply