Milta Jo Koi TukDa Is charKH-E-Zabarjad Mein

miltā jo koī TukḌā is charḳh-e-zabarjad meñ

paivand lagā detā maiñ nafs-e-mujarrad meñ

bedāri-e-furqat meñ thā ramz qayāmat kā

jaagā huuñ ki niind aa.e tārīki-e-marqad meñ

is daftar-e-hastī meñ tālīm bahut kam hai

do harf nazar aa.e dībācha-e-abjad meñ

go ḳhaak kā putlā huuñ lekin koī kyā samjhe

maiñ bhī koī shai huuñ jo gardūñ hai mirī kad meñ

hai zabt kī farmā.ish is dil se bahut bejā

ye qulzum-e-lā-sāhil kis tarah rahe had meñ

pahlū meñ nahīñ dil to dil-soz hī aa jaatā

ik sham.a to jal jaatī tārīki-e-marqad meñ

nāloñ se ye kahtā huuñ himmat se na dil hāreñ

tāroñ ne jagah kar lī is lauh-e-zamurrad meñ

Leave a Comment