Poet
dil ki chori men jo chashm-e-surma-sa pakdi gai
vo tha chin-e-zulf men ye be-khata pakdi gai
subh ku-e-yar men bad-e-saba pakdi gai
yaani ghibat men gulon ki mubtala pakdi gai
dil chadha mushkil se taq-e-abru-e-khamdar par
sau jagah raste men jab zulf-e-rasa pakdi gai
jaan kar ankhen churain tu ne ham se bazm men
teri chori dekh li kya bad-numa pakdi gai
hai isi men qalb-e-mahzun shartiya kahta huun main
khol mutthi teri chori mah-laqa pakdi gai
mast ho kar us ki khushbu se gira tha bach gaya
jab sambhalne ko vo zulf-e-mushk-sa pakdi gai
har taraf sehn-e-chaman men kahti phirti hai nasim
gul se hansti khilkhilati motiya pakdi gai
apne hathon par liye phirte hain vo har dam halaf
aad qasmon ki to mujh se barha pakdi gai
rukh se gul ko tha taalluq zulf se sumbul ko mel
ek ja gantha use ye ek ja pakdi gai
yaar hai khanjar-ba-kaf aur jan-nisaron ka hujum
haae ye kis jurm men khalq-e-khuda pakdi gai
aap hi ka aasra hai aap kijega madad
hashr men ‘parvin’ agar ya mustafa pakdi gai
Leave a Reply