ek kachhve ke aa gai ji men
kijiye sair o gasht khushki ki
ja raha tha chala hua khamosh
us se nahaq ulajh pada khargosh
miyan kachhve! tumhari chaal hai ye
ya koi shamat aur vabal hai ye
yuun qadam phunk phunk dharte ho
goya uttu zamin pe dharte ho
kyuun hue chal ke muft men bad-nam
be-chale kya atak raha tha kaam
tum ko ye hausla na karna tha
chullu paani men duub marna tha
ye tan-o-tosh aur ye raftar
aisi raftar par khuda ki maar
bola kachhva ki hon khafa na huzur
main to huun aap mo’tarif ba-qusur
agar ahistagi hai jurm-o-gunah
to main khud apne jurm ka huun gavah
mujh ko jo sakht sust farmaya
aap ne sab durust farmaya
mujh ko ghafil magar na janiyega
banda-parvar bura na maniyega
yuun zabani javab to kya duun
shart bad kar chalo to dikhla duun
tum to ho aftab men zarra
par mita dunga aap ka ghurra
sun ke khargosh ne ye talkh javab
kaha kachhve se yuun zi-ru-e-itab
tu kare meri ham-sari ka khayal
teri ye taab ye sakat ye majal
chyunti ke jo par nikal aae
to yaqin hai ki ab ajal aae
are bebak! bad-zaban munh-phat
tu ne dekhi kahan hai daud jhapat
jab main tezi se jast karta huun
shahsavaron ko past karta huun
gard ko meri bad-e-pa na lage
laakh daude mira pata na lage
rail huun barq huun chhalava huun
main chhalave ka balki baava huun
teri meri nibhegi sohbat kya
asman ko zamin se nisbat kya
jis ne bhugte hon turki o taazi
aaise mariyal se kya bade baazi
baat ko ab ziyada kya duun tuul
khair karta huun teri shart qubul
hai munasib ki imtihan ho jaae
taaki aib o hunar ayaan ho jaae
al-gharaz ik maqam thahra kar
hue donon harif garm-e-safar
bas-ki zoron pe tha chadha khargosh
tezi phurti se yuun badha khargosh
jis tarah jaae top ka gola
ya gire asaman se ola
ek do khet chaukdi bhar ke
apni chusti pe afrin kar ke
kisi goshe men so gaya ja kar
fikr ”kya hai chalenge susta kar”
aur kachhva gharib ahista
chala siine ko khaak par ghista
suui ghante ki jaise chalti hai
ya ba-tadrij chhanv dhalti hai
yunhi chalta raha ba-istiqlal
na kiya kuchh idhar udhar ka khayal
kaam karta raha jo pai-dar-pai
kar gaya rafta rafta manzil tai
haif khargosh rah gaya sota
samra ghaflat ka aur kya hota
jab khuli aankh to savera tha
sakht sharmindagi ne ghera tha
sabr o mohabbat men hai sar-afrazi
sust kachhve ne jiit li baazi
nahin qissa ye dil-lagi ke liye
balki ibrat hai aadmi ke liye
hai sukhan is hijab men ru-posh
varna kachhva kahan kahan khargosh
Leave a Reply