Raz Chandpuri
taufiq agar rahbar-e-manzil nahin hoti
me.araj-e-mohabbat kabhi hasil nahin hoti
jo soz-e-mohabbat se na ho sho.ala-ba-daman
vo sham.a kabhi raunaq-e-mahfil nahin hoti
jo aankh na ho husn-e-haqiqat ki shanasa
vo did-e-ruḳh-e-yar ke qabil nahin hoti
jab tak na bhare rang vafa mani-e-fitrat
tasvir-e-mohabbat kabhi kamil nahin hoti
dilkash hain kuchh aise rah-e-ulfat ke manazir
rahrav ko kabhi ḳhvahish-e-manzil nahin hoti
gir paḌta huun aksar main rah-e-ishq men jis ja
ik marhala hota hai vo manzil nahin hoti
na-kam mohabbat huun main ai ‘raz’ to kya gham
ye baat bhi har ek ko hasil nahin hoti
Leave a Reply