Poet
ḳhud se kitna kiya dagha main ne
abhi sikhi nahin vafa main ne
nikla chuha pahaḌ ko khoda
jo kiya jo kaha suna main ne
kholiye kyuun dukhon ke daftar ko
sochna band kar diya main ne
haan lagaya hai zikr azmat par
zor se ek qahqaha main ne
hasil-e-zist hai ki dekha hai
sumbul-o-sabz-o-saba main ne
zindagi zahar tha use suqrat
jur.a jur.a magar piya main ne
chhup ke baiTha huun sharmsari se
ka.abe se duur li hai ja main ne
ye to tazlil hai shahadat ki
kabhi manga na ḳhun-baha main ne
jab baḌhi aur sharm-e-uryani
oḌh li ḳhaak ki qaba main ne
apne dil ko to si nahin sakta
apne honTon ko si liya main ne
ḳhauf se bhaag nikla majlis se
jab suna zikr-e-karbala main ne
Leave a Reply