asia ke dur-uftada shabistanon men bhi
mere khvabon ka koi ruman nahin!
kaash ik divar-e-zulm
mere un ke darmiyan haail na ho!
ye imarat-e-qadim
ye khayaban, ye chaman, ye lala-zar,
chandni men nauha-khvan
ajnabi ke dast-e-gharat-gar se hain
zindagi ke in nihan-khanon men bhi
mere khvabon ka koi ruman nahin!
kaash ik ”divar-e-rang”
mere un ke darmiyan haael na ho!
ye siyah-paikar barahna rah-rau
ye gharon men khub-surat auraton ka zahr-e-khand
ye guzargahon pe dev-asa javan
jin ki ankhon men gurisna arzuon ki lapak
mushtail be-bak mazduron ka sailab-e-azim!
arz-e-mashriq, ek mubham khauf se larzan huun main
aaj ham ko jin tamannaon ki hurmat ke sabab
dushmanon ka samna maghrib ke maidanon men hai
un ka mashriq men nishan tak bhi nahin!
Leave a Reply