shohrat hai meri sukhan-vari ki
hindi men hai tarz farsi ki
kyuun zikr-e-visal se khafa ho
ye baat to hai hansi-khushi ki
allah re nazakat-e-lab-e-yar
but-khane pade jo mai-kashi ki
shikva na karun main ta-lab-e-gor
dushman bhi kahe ki dosti ki
ho dida-e-mehr shabnam-afshan
halat jo dikhaun be-kasi ki
jab maut kisi tarah na aae
ghabra kar ham ne ashiqi ki
khamosh ho shama rote rote
taqrir karun jo khamushi ki
ai maut azaab se chhudaya
is qaid se tu ne mukhlisi ki
bulbul ko kiya asir-e-gul-dam
sayyad ne khuub munsifi ki
dekha jo vo rashk-e-mah-e-kanan
rangat hui zar-dastari ki
pahunche na ba-rang-e-shana ta zulf
kya bakht-e-siyah ne kotahi ki
dozakh ki tarah jalen na zahid
jannat men bhi ham ne mai-kashi ki
naale kiye chupke chupke roe
kya kya gham yaar ki khushi ki
ghulon ne lahad pe huun vo vahshi
ankhon se aa ke raushni ki
ai ‘arsh’ khuda-o-but ahad hain
mushrik ko samai hai dui ki
Leave a Reply