Aslam Mahmood
dekh ke arzan lahu surḳhi-e-manzar ḳhamosh
bazi-e-jan par miri tegh bhi shashdar ḳhamosh
aks mira muntashir aur ye aalam ki hai
ek ik a.ina chup ek ik patthar ḳhamosh
tegh-e-nafas ko bahut naaz tha raftar par
ho ga.i aḳhir mire ḳhuun men naha kar ḳhamosh
arsa-e-hairat men gum a.ina-ḳhane mire
ḳhema-e-mizhgan men hain ḳhvab ke paikar ḳhamosh
ḳhauf se sab dam-ba-ḳhud fikr se chehre udaas
mauj-e-hava kyuun hai chup kyuun hai samundar ḳhamosh
koi alamat to ho koi nishan to mile
kyuun hai lahu be-sada ho ga.e kyuun sar ḳhamosh
Leave a Reply