Ahmad Shahryar
ashk bhejen mauj ubharen abr jaari kijiye
mehrban sail-e-bala ki abyari kijiye
ai charagh-e-taq-e-janan ai hava-e-ku-e-dost
apni kaifiyyat zara ham par bhi taari kijiye
sham-e-hijran men sitaron ko na thahraen sharik
aina-khane men aa kar khud-shumari kijiye
ashk-bari sina-chaki dil-kharashi ho chuki
liije sahib ishq ka farman jaari kijiye
hont kahte hain baha diije lahu ashar men
zulf kahti hai miyan tarkib bhari kijiye
dekhiye maah o sitara ghumiye arz o sama
chaliye bahar bad-e-khud-sar ki savari kijiye
ishq ka agla padav main huun main duniya-parast
al-madad ai qais ai farhad yaari kijiye
yuun to malne se rahi ye saltanat so shahryar
paanv pad kar roiye minnat-gizari kijiye
Leave a Reply