zamin ka rang vahi asman ka rang vahi
vahi sabahat-e-gul hai bina-e-sang vahi
jo ḳhvab ban nahin paaya tha meri ankhon ka
Thahar gaya hai mire aa.ine pe zang vahi
badan men aag lagate hue dua ke haath
lahu men phuul khilati hui umang vahi
badalne vaala hi ḳhud ko badal nahin paaya
vahi bahane hain us ke hain uzr-e-lang vahi
hazar sulh ka parcham buland kar dekho
magar zamin pe musallat rahegi jang vahi
purani vaz.a se aaya huun tere kuche men
badan main zor vahi ruuh men tarang vahi
kuchh aise Dhang se tabdil ho raha hai vo
ki rah na jaa.e kisi marhale pe dang vahi
vahi nagar vahi galiyan vahi makin ‘sajid’
paḌi hai paanv men zanjir-e-nam-o-nang vahi
Leave a Reply