khuda hashr men ho madad-gar mera
ki dekhi hain main ne mrs.-sala-manka ki ankhen
mrs.-sala-manka ki ankhen
ki jin ke ufuq hain junubi samundar ki niili rasai se aage
junubi samundar ki niili rasai
ki jis ke jazire hujum-e-sahar se darakhshan
darakhshan jaziron men zartab o unnab o qurmuz parindon ki jaulan-gahen
aise phaili hui jaise jannat ke daman
parinde azal aur abad ke mah o saal men bal-afshan!
khuda hashr men ho madad-gar mera
ki main ne liye hain mrs.-sala-manka ke honton ke bose
vo bose ki jin ki halavat ke chashme
shumali zaminon ke zartab o unnab o qurmuz darakhton
ke madhosh baghon se aage
jahan zindagi ke rasida shagufon ke sinon
se khvabon ke ram-dida zambur lete hain ras aur piite hain vo
ki jis ke nashe ki jila se
zamanon ki nadida mehrab ke do kinaron ke niche
hain yak-bargi guunj uthte khala o mala ke jalajil
jalajil ke naghme baham aise paivast hote hain jaise
mrs.-sala-manika ke lab mere lab se!
khuda hashr men ho madad-gar mera
ki dekha hai main ne
mrs.-sala-manka ko bistar men shab bhar barahana
vo gardan vo bahen vo ranen vo pistan
ki jin men junubi samundar ki lahron ke tufan
shumali darakhton ke baghon ke phulon ki khushbu
jahan dam-ba-dam itr o tufan baham aur gurezan
mrs.-sala-manika ka jism-e-barhana
ufuq-ta-ufuq jaise angur ki bel jis ki
ghiza asmanon ka nuur aur hasil
vo lazzat ki jis ka nahin koi payan
khuda ke siva kaun hai pak-daman!
Leave a Reply