aankh ki putli men suraj sar men kuchh sauda uga
paniyon men surḳh paude dhuup men saaya uga
asman ki bhiiḌ men to is liye socha gaya
is zamin ki chhatiyon se nuur ka chashma uga
niind men chalne ki aadat ḳhvab men likhne ka fan
ek jaisi baat hai to atish-e-naghma uga
main ne apni donon ankhon men ugaa.e hain pahaḌ
teri ankhon men samundar tha vahan sahra uga
sabza-e-begana ban kar ji liya to kya jiya
ḳhud ko bo kar is zamin se ik naya chehra uga
dhuup jaise qahqahe hain ret jaisi baat hai
tu agar ghavvas hai to ret men dariya uga
ye zamin buḌhi hai us ko piiTh se apni utaar
asman ko jeb men rakh le na.i duniya ka uga
ham to ḳhud iz.har hain apne zamane ka ‘matin’
bujh ga.e avaz ke sho.ale naya lahja uga
Leave a Reply